شر البلية ما يضحك..... إلى متى هذا الحال في مساجدنا؟؟

[أم أنس]

السلام عليكم ورحمة الله وبركاته


شوفوا يا جماعة رايحة ندخل فالموضوع مباشرة...

اليوم قررت نروح للمسجد باه نصلي التراويـــح,قلت بالاك قلبي -الصخرة- بالاك يلين شوية وبلاك تاني يساعدني شوية في مراجعة الأحزاب الأولى...

إمال رحت....عيّطت لبنات عمتي ورحنا...

وبدأ الشيخ يقرا..كان يقرأ من سورة البقرة ..


الركعة اللولة جازت لاباس...بصح امبعد ابدا يخلّط..
كان يقرا صفحة والا صفحة ونص -أكيد مع الاخطاء- وكي يمحي آية..والا يلّصق هاذي في هاذي..ويجوز -يقول اسلكت-:idea:

وخلاص يرووووح:bigsmile: ,يفوت الآية..يعاود يولي لنفس الصحة ويعاود يقراها...:shutup:ويغلط نفس الغلطة..ماعلاباليش ..كيفاه ما فاقش بلي هذيك الصفحة قراها من قبل..وكيفاش ما يشفاش وهو غلط فيها وعاودها 4والا5مرّات..


بالاك كاين اللي يقول أنو عادي..أي انسان ممكن ينسى آيات ويغلط..بصّح أنا الحاجة اللي حبستني من راسي هي انو ولا واحد من المصلين قال يا ودي راك غالط وصححلوا..كامل ساكتين...لهذي الدرجة خلاصوا حفّاظ القرآن..؟؟


نعاود نولي للقصة..كي كان المقرئ يغلط..ويغلط..النساء عدنا الفوق..كانت الوحدة تصبر تصبر أو مباعد تقعد..لسان حالها يقول: كي تفريها قولنا:busted_red:

أيا كي كملنا اربع ركعات ,جا الإمام تاعنا وكان اتقلق:busted_red: وصلى بينا الشفع والوتر... وخرجنا..


سبحان الله,لهذي الدرجة ماكاش ناس يحفظوا القرآن..؟؟

هذا في هذا الوقت ما لقيناش شكون يصلي بينا..بصّح اومبعد..

فالعوام الجايين كيفاه راح يكون الحال والناس كل واحد لاتي غير بالدنيا ونساوا القرآن...؟؟


للعلم انا هذا المقرئ ليس من حيينا...إمام مسجدنا يقوم برحلة سنوية للزوايا حتى يبحث عن مقرئين يصلوا بنا..لأن في حيينا ولا واحد يحفظ القرآن...حتى الإمام...وفي فترات مضت كان يقرا هو من المصحف ويصلي بينا...وكي تروح التريسيتي..نخرجوا وماكاش صلاة..



واش حبيت نقول أنو يا جمااااعة وين رانا رايحين بهذي العقلية..كل واحد يقول خاطيني..والقرآن في كل يوم يزداد غربة في بلاد المسلمين..


لا حول ولا قوة إلا بالله

[عنقاء]

هذه هي الاخطاء التي تاخذنا الى الهاوية ..................شكرا لك غاليتي على الموضوع ....

[أم أنس]

هذه هي الاخطاء التي تاخذنا الى الهاوية ..................شكرا لك غاليتي على الموضوع ....

بصّح حنونة الحل وين...؟؟كل يوم نبعدوا اكثر واكثر...وين رانا رايحين بهاذي العقلية...؟؟

على العموم شكرا لمرورك حبيبتي,وإن شاء الله ستعود للقرآن مكانته في الصدوووور

[القيصر]

صح عندكــ الحقــ . . كاينينــ ناســ لاعبينها حافظينــ القرانــ و هومــا والو كيفيــ أنا بعد . .

مامـ كيــ يغلطـ الإمامـ يباصيــ المسكينــ ميصيبشــ الليـ يساعدو . .

غير أحنا ليجانــ هازينــ نساخيــ و نقيديوه شوية شوية . . يعنيــ كارثة . .

[أم أنس]

صح عندكــ الحقــ . . كاينينــ ناســ لاعبينها حافظينــ القرانــ و هومــا والو كيفيــ أنا بعد . .

مامـ كيــ يغلطـ الإمامـ يباصيــ المسكينــ ميصيبشــ الليـ يساعدو . .

غير أحنا ليجانــ هازينــ نساخيــ و نقيديوه شوية شوية . . يعنيــ كارثة . .






يعني المشكل تقريبا فالدزاير كامل,ماهوش عندنا برك......؟؟ربي يستر

[smail-dz]

السلام عليكم

و اله احنا عندنا شاب اصلي بينا و17 سنة ما شاء الله اعليه

حافظ بطريقة رائعة و ايضا كاين ياسر الىيحفظو عندنا

لانه عندنا زاوية تخرج في حفطة القرأن

مزال كاين الخير في بلادنا و مزال كاين اهل القرآن

[MODFOR]

هده الاشياء تحدث في عدة مساجد
ذكرتيني في أحد ايام رمضان عندما كنت اصلي التراويح أخطأ الامام , فبدأ كل المصلين الدين من ورائه بتصحيح له حتى بدت فوضى كبيرة , ومباشرة مع إنتهاء الركعة نهى الامام عن هده الفوضى وقال '' هناك من يصحح لي فلا تقلقو ''

[أم أنس]

السلام عليكم

و اله احنا عندنا شاب اصلي بينا و17 سنة ما شاء الله اعليه

حافظ بطريقة رائعة و ايضا كاين ياسر الىيحفظو عندنا

لانه عندنا زاوية تخرج في حفطة القرأن

مزال كاين الخير في بلادنا و مزال كاين اهل القرآن



الحمد لله,انو عندكم ناس هكذا,راني حوّست دوكا في محرك البحق لقيت عدد سكان الحي تاعنا 12000 نسمة,يعني في هذا العدد كامل ماكاش انسان يحفظ القرآن للأسف.
شكرا لمرورك أخي اسماعيـــل وبالاك الإمام تاعنا راهو يجي ليكم باه يجيب مقرئ والا زوج خاطرش تاع البارح راهو حاوزو..


السلام عليكم

[أم أنس]

هده الاشياء تحدث في عدة مساجد
ذكرتيني في أحد ايام رمضان عندما كنت اصلي التراويح أخطأ الامام , فبدأ كل المصلين الدين من ورائه بتصحيح له حتى بدت فوضى كبيرة , ومباشرة مع إنتهاء الركعة نهى الامام عن هده الفوضى وقال '' هناك من يصحح لي فلا تقلقو ''

شكرا لمروك اخي وتقبل الله صيامكم وقيامكم.

[أميره مصر]

للأسف ده بيحصل في مساجد كتير
مش لان مافيش ناي حافظه القرأن
لا لإن فيه ناس فاكره ان إمامه الناس في الصلاه دي ميزه وتفاخر
فبتتقدم تصلي بالناس وهما مش مجدين لحفظ القرأن
في حين ان فيه شباب ورجال حافظين القرأن افضل منهم بيصلوا خلفهم
ودي مشكله كبيره جدا
اننا بنتصرف من غير مانفهم
ومش عارفين ان الأخطاء الي في الصلاه دي بتخليه يأخد ذنبه وذنب كل الي بيصلي وراه
ربنا يهدينا جميعا ويصلح احوال امتنا

[أبو البراء التلمساني]

ههههههه الله المستعان لهذه الدرجة! والله شر البلية ما يضحك أين الشبااااب

على كل لا نقول أن الدنيا عدمت خيرا فأبشركم أن في المسجد الذي نصلي فيه ما شاء الله عدد كبير من حفظة كتاب الله وبأكام تجويده وكل يقرأ بصيغة معينة فهذا يقرأ مثل ماهر المعيقلي وهذا مثل خالد القحطاني وهذا مثل الغامدي، يعني كل مرة تتخيل نفسك في مكان، وغالبا الصف الأول بعد الإمام يكون مليء بالحفظة المتقنين ..

الأمر الذي شدني أنه يخطئ في سورة البقرة! والتي هي أسهل سورة قي القرآن والله، الله المستعان اللهم اؤجرنا فيمصيبتنا واخلف لنا خيرا منها

وكذلك لا تقولي لا يوجد حفظة قرآن

فهذا زمن فتن ..وقد يكون بينكم الخفي التقي الذي لا يحب الظهور فأبشروا وادعوا الله كثيرا وأكثروا كذلك من الاستغفار

ولا حبيتو نفليكسيولكم شوية مقرئين لا يوجد إشكال..صح فطوركم ولا تنسونا من الدعاء في القيام